AVTANDIL
SS16
Mercedes-Benz Fashion Week Tbilisi ერთ-ერთმა ყველაზე სახელგანთმულმა ქართველმა დიზაინერმა, ავთანდილ ცქვიტინიძემ, თავისი მრავალფეროვანი კოლექციით გახსნა.
ალბათ ყველას გვახსოვს ავთანდილის გასული სეზონის კოლექციები ჭრელი ფერებითა და არაერთგვაროვანი ფორმებით, თუმცა ამ სეზონის კოლექცია სხვა დანარჩენისგან განსხვავდებოდა. რა თქმა უნდა იყო გასული კოლექციებიდან განმეორებული ნიუანსები , რაც ერთგვარ კავშირს ქმნიდა და დიდად არ განასხვავებდა წინა სეზონებისგან. ავთანდილი ერთ-ერთი გავლენიანი დიზაინერია საქართველოში, რაც ყველაზე დასაფასებელია მასში – გამბედავი აღმოჩნდა პირველი ნაბიჯების გადადგმისას. ამ ხნის მანძილზე მის სამოსს აქტუალობა არ დაუკარგავს. რამდენმა ინსპირაციამ განვლო მის ხელში, მაგრამ ნებისმიერ კოლექციას ეტყობა ავტორის ხელწერა.
ამ სეზონზე დიზაინერმა წარმოგვიდგინა თამამი ქალი, რომელიც არ ერიდება ყურადღების მიქცევას ჭრელი ფერებითა და მბზინავი ტექსტილებით. კოლექცია დატვირთული იყო საოცრად ეფექტური სამოსით, თუმცა რამდენიმე მოდელი იმდენად უბრალო ჩანდა, რომ ამოვარდდნილი იყო საერთო სტილიდან.
უნდა აღინიშნოს ატლასის კაბები რომელიც ქალის იმ სხეულის ნაწილებს უსვამდა ხაზს რომელიც სექსუალურობას განაპირობებს. უყურადღებოდ არ მინდა დავტოვო ჩემი ფავორიტი ლუქი, ბრჭყვიალა, უმკლავებო კაბა რომელიც კოლექციიდან გამოვყავი რადგან ყველაზე მეტად ახალგაზრდული და “თინეიჯერული” იყო, სხვა დანარჩენი კი საოცრად ქალური.
რაც შეეხება ფეხსაცმელებს, ვერ ვიტყოდი რომ აღვფრთოვანდი, ვინაიდან წარმოდგენილი იყო რამდენიმე სხვადასხვა სტილის, ერთმანეთისაგან რადიკალურად განსხვავებული ფეხსაცმელი, რომლებიც ლუქებს კარგად ერგებოდა, მაგრამ ვერაფრით იფიქრებდით რომ ერთმა დიზაინერმა შექმნა კონკრეტული კოლექციისთვის. განსაკუთრებულად მომხიბლავი იყო ღია მაღალქუსლიანი ფეხსაცმელი, რომელიც ხაზს უსვამდა ქალის მტკიცე ხასიათს. სრულიად საპირისპირო შეიძლება ითქვას დაბალძირიან , დახურულ ფეხსაცმელზე რომელიც უფრო კონსერვატულ ხასიათს ატარებს.
ავთანდილი არ ერიდება სხვადასხვა მატერიების გამოყენებას მეტი ეფექტურობისთვის და ხასიათის კარგად გადმოსაცემად, მთავარია არ იყოს გამაღიზიანებელი. ამ სეზონის კოლექცია გასული სეზონის კოლექციებთან შედარებით უკეთესი იყო. შენარჩუნებული ჰქონდა ძველი კოლექციის დეტალები როგორიცაა: მხატვრული პრინტები და ჯინსის ნაჭრის მაღალქუსლიანი ფესაცმელები. სიახლეს კი ბრჭყვიალა მატერიები წარმოადგენდა, რაც საერთო ჯამში ძალიან მოუხდა და კოლექციის ერთგვარ ღერძად იქცა. აქვე მინდა ჩემი სუბიექტურ აზრი დავაფიქსირო კოლექციასთან დაკავშირებით, რომელიც უკავშირდება მატერიების შეუთავსებლობას. რამოდენიმე ადგილას მომეჩვენა რომ ორი ერთმანეთისაგან განსხვავებული ფაქტურა ერთმანეთს ვერ შეეწყო, დიზაინერმა კოლექციაში მდიდრული და ნაკლებეფექტური ნაჭრები ერთმანეთს შეუთავსა და სწორედ ეს შეთავსება არ მომეწონა. ვთვლი რომ ატლასის კაბებზე ბრჭყვიალა დეტალები სრულიად ზედმეტი იყო, ვინაიდან კაბა მათ გარეშეც არ დაკარგავდა ეფექტს.
საერთო ჯამში კოლექცია განსაკუთრებული იყო და გამოირჩეოდა წინა კოლექციებისაგან. რაც მთავარია ხასიათი შენარჩუნებული იყო, ძლიერი, თავდაჯერებული , მტკიცე ქალის სახე, რომელიც არ ერიდება ახალ გამოწვევებს და მუდამ ყურადღების ცენტრშია.
No comments:
Post a Comment